ᱥᱚᱥᱚᱱᱚᱜ ᱨᱮᱱᱟᱜ
ᱯᱤᱨᱤᱞ ᱯᱤᱨᱤᱞ ᱫᱷᱩᱶᱟᱹ ᱟᱧᱪᱟᱨᱛᱮ
ᱤᱧᱟᱜ ᱢᱮᱸᱫ ᱢᱩᱴᱷᱟᱹᱱ ᱛᱟᱸᱦᱮ ᱠᱟᱱᱟ
ᱴᱷᱤᱠ ᱫᱟᱹᱣᱲᱟᱹ ᱪᱮᱛᱟᱱ
ᱴᱩᱴᱩᱨᱤ ᱵᱟᱹᱴᱩᱨᱤ ᱱᱟᱣᱟ ᱵᱟᱦᱩ᱾
ᱠᱚᱭᱚᱜ ᱤᱧ ᱨᱤᱠᱟᱹ ᱟᱠᱟᱫ ᱨᱮ
ᱪᱤᱸᱠᱟᱹᱲ ᱪᱟᱸᱫᱳ ᱡᱩᱨᱤ ᱛᱤᱧ
ᱜᱷᱟᱱᱮ ᱥᱳᱨ ᱠᱷᱚᱱ
ᱜᱷᱟᱱᱮ ᱥᱟᱹᱜᱤᱧ ᱠᱷᱚᱱ
ᱧᱮᱞ ᱟᱠᱟᱫᱤᱭᱟᱹᱧ ᱯᱳᱞᱥᱳ ᱯᱳᱞᱥᱳ᱾
ᱢᱚᱱᱮᱭ ᱩᱲᱵᱤ ᱟᱠᱟᱫ ᱛᱤᱧᱟ
ᱡᱤᱣᱤᱭ ᱨᱚᱸᱫᱷᱚᱱ ᱟᱠᱟᱫ ᱛᱤᱧᱟ
ᱡᱤᱣᱤ ᱜᱟᱛᱮ ᱥᱟᱶ
ᱢᱮᱸᱫ ᱯᱮᱨᱮᱡ ᱧᱮᱯᱮᱞ ᱞᱟᱜᱤᱫ;
ᱢᱮᱱᱠᱷᱟᱱ—
ᱛᱟᱸᱦᱮ ᱟᱠᱟᱱᱟᱹᱧ ᱩᱫᱽᱵᱩᱠᱟᱹᱣ ᱯᱚᱴᱚᱢᱨᱮ
ᱥᱚᱥᱚᱱᱚᱜᱟᱜ ᱫᱷᱩᱶᱟᱹ ᱜᱮᱸᱫᱟᱜ ᱛᱮ᱾
ᱛᱮᱦᱮᱧ
ᱠᱳᱨᱳᱱᱟ ᱟᱡᱟᱨ ᱟᱨᱟᱣ ᱟᱠᱟᱫᱟᱭ
ᱡᱚᱜᱽ ᱢᱟᱹᱡᱷᱤ ᱥᱤᱨᱯᱟᱹ
ᱥᱚᱥᱚᱱᱚᱜᱟᱜ ᱵᱚᱦᱚᱜ ᱨᱮ;
ᱤᱧᱟᱜ ᱴᱩᱴᱩᱨᱤ ᱚᱴᱟᱜ ᱢᱚᱞᱚᱝ
ᱧᱮᱞ ᱧᱟᱢ ᱮᱫᱟᱭ ᱡᱩᱨᱤᱛᱤᱧ ᱰᱤᱜᱽᱢᱤᱜᱽ᱾
ᱟᱹᱰᱤ ᱫᱤᱱ ᱛᱟᱭᱚᱢ
ᱟᱞᱤᱧᱟᱜ ᱫᱚᱲᱦᱟ ᱱᱤᱨᱞᱟ ᱧᱮᱯᱮᱞ;
ᱡᱤᱭᱟᱹᱲ ᱢᱮᱱᱟᱜᱼᱟ ᱥᱮᱫᱟᱭ ᱥᱟᱹᱜᱟᱹᱭ
ᱱᱤᱛᱦᱚᱸ—
“ᱟᱪᱩᱨᱮ ᱵᱤᱦᱩᱨᱮ
ᱥᱮᱸᱜᱮᱸᱞᱮ ᱛᱤᱛᱤ ᱫᱚ–᱾”
ᱞᱟᱸᱫᱟᱭ ᱮᱫ ᱞᱮᱠᱟ ᱤᱧᱟᱜ ᱢᱩᱴᱷᱟᱹᱱ
ᱪᱮᱫᱟᱜ ᱥᱮ—
ᱯᱚᱴᱚᱢ
ᱩᱫᱽᱵᱩᱠᱟᱹᱣ ᱟᱠᱟᱱ ᱡᱤᱣᱤᱛᱤᱧᱨᱮ
ᱛᱮᱦᱮᱧ ᱥᱟᱸᱦᱮᱫ ᱤᱧ ᱠᱩᱲᱟᱹᱣ ᱟᱠᱟᱫᱟ ᱾
***
