᱑᱐᱐ ᱮᱞ ᱫᱚ ᱟᱹᱰᱤ ᱜᱚᱨᱚᱵᱽ, ᱨᱟᱹᱥᱠᱟᱹ ᱟᱨ ᱢᱤᱫ ᱢᱟᱭᱤᱞ ᱠᱷᱩᱱᱴᱤ ᱮᱞ ᱠᱟᱱᱟ ᱾ ᱢᱤᱫ ᱠᱨᱤᱠᱮᱴ ᱤᱱᱩᱝᱤᱭᱟᱹ ᱑᱐᱐ ᱨᱚᱱ ᱮ ᱥᱮᱴᱮᱨ ᱞᱮᱠᱷᱟᱱ ᱨᱟᱹᱥᱠᱟᱹᱭᱟᱭ ᱟᱨ ᱚᱱᱟ ᱫᱚ ᱱᱟᱜᱟᱢ ᱨᱮᱦᱚᱸ ᱚᱞ ᱛᱟᱦᱮᱸᱱᱟ ᱾ ᱑᱐᱐ ᱫᱚ ᱢᱤᱫ ᱥᱚᱫᱤ ᱵᱟᱝᱢᱟ ᱥᱮᱧᱪᱩᱨᱤ ᱦᱚᱸᱵᱚ ᱢᱮᱛᱟᱜ ᱠᱟᱱᱟ ᱾ ᱚᱱᱟ ᱥᱟᱭ ᱥᱮᱨᱢᱟ ᱨᱮᱜᱮ ᱛᱮᱦᱮᱧ ᱚᱞᱪᱤᱠᱤ ᱫᱚ ᱥᱮᱴᱮᱨ ᱟᱠᱟᱱᱟ ᱾ ᱱᱟᱜᱟᱢ ᱚᱴᱟᱜ ᱠᱟᱛᱮ ᱧᱮᱞ ᱞᱮᱠᱷᱟᱱ ᱵᱟᱰᱟᱭᱚᱜᱼᱟ ᱑᱐᱐ ᱥᱮᱨᱢᱟ ᱨᱮᱫᱚ ᱫᱷᱟᱹᱨᱛᱤ ᱨᱮᱭᱟᱜ ᱟᱹᱰᱤ ᱜᱟᱱ ᱡᱤᱱᱤᱥ ᱟᱹᱨᱩ ᱯᱷᱮᱨᱟᱣ ᱠᱚᱜᱼᱟ ᱾
ᱥᱟᱭ ᱥᱮᱨᱢᱟ ᱨᱮ ᱚᱞᱪᱤᱠᱤ ᱟᱜ ᱴᱷᱟᱶ ᱚᱠᱟᱨᱮ ᱢᱮᱱᱛᱮ ᱡᱩᱫᱤ ᱠᱩᱠᱞᱤ ᱵᱚ ᱫᱚᱦᱚᱭ ᱠᱷᱟᱱ ᱞᱟᱹᱱᱟᱹᱭ ᱫᱚ ᱦᱤᱡᱩᱜᱼᱟ ᱜᱚᱴᱟ ᱫᱷᱟᱹᱨᱛᱤ ᱯᱩᱨᱤ ᱱᱚᱶᱟ ᱫᱚ ᱱᱤᱛ ᱥᱮᱴᱮᱨ ᱟᱠᱟᱱᱟ ᱾ ᱢᱤᱫᱴᱟᱝ ᱫᱤᱥᱚᱢ ᱨᱮᱱᱤᱡ ᱨᱟᱥᱴᱨᱚᱯᱚᱛᱤ ᱟᱨ ᱯᱨᱚᱫᱷᱟᱱ ᱢᱚᱱᱛᱨᱤ ᱛᱮᱦᱮᱧ ᱥᱟᱱᱛᱟᱲᱤ ᱯᱟᱹᱨᱥᱤ, ᱚᱞᱪᱤᱠᱤ ᱛᱮᱠᱤᱱ ᱴᱣᱤᱴ ᱮᱫᱟ ᱾ ᱨᱟᱡᱽ ᱵᱷᱚᱵᱚᱱ ᱨᱮᱭᱟᱜ ᱧᱩᱛᱩᱢ ᱚᱞᱪᱤᱠᱤ ᱛᱮ ᱚᱞ ᱟᱠᱟᱱᱟ ᱾ ᱣᱤᱠᱤᱯᱮᱰᱤᱭᱟ, ᱵᱤᱠᱟᱥᱯᱮᱰᱤᱭᱟ, ᱥᱟᱶᱛᱮ ᱟᱨᱦᱚᱸ ᱟᱭᱢᱟ ᱣᱮᱵᱽᱥᱟᱭᱤᱴ ᱚᱞᱪᱤᱠᱤ ᱛᱮ ᱵᱮᱱᱟᱣ ᱟᱠᱟᱱᱟ ᱾ ᱫᱤᱯᱥᱤᱠ, ᱪᱟᱴ ᱡᱤ ᱯᱤ ᱴᱤ ᱟᱨ ᱢᱮᱴᱟ ᱮ ᱟᱭ ᱠᱚ ᱚᱞᱪᱤᱠᱤ ᱛᱮ ᱛᱮᱠᱟ ᱠᱚ ᱮᱢ ᱫᱟᱲᱮᱭᱟᱜ ᱠᱟᱱᱟ ᱾ ᱵᱚᱪᱷᱚᱨ ᱜᱮ ᱥᱟᱭ ᱥᱟᱭ ᱯᱚᱛᱚᱵ ᱚᱞᱪᱤᱠᱤ ᱛᱮ ᱪᱷᱟᱯᱟᱜ ᱠᱟᱱᱟ ᱾ ᱟᱭᱢᱟ ᱡᱮᱜᱮᱫ ᱵᱤᱨᱫᱟᱹᱜᱟᱲ ᱟᱨ ᱮᱛᱚᱦᱚᱵ ᱵᱤᱨᱫᱟᱹᱜᱟᱲ ᱠᱚᱨᱮ ᱥᱟᱱᱛᱟᱲᱤ ᱯᱟᱹᱨᱥᱤ, ᱚᱞᱪᱤᱠᱤ ᱛᱮ ᱚᱞᱚᱜ ᱯᱟᱲᱦᱟᱣ ᱪᱟᱹᱞᱩᱜ ᱠᱟᱱᱟ ᱾ ᱵᱮᱝᱜᱚᱞ, ᱳᱰᱤᱥᱟ ᱟᱨ ᱡᱷᱟᱨᱠᱷᱚᱱᱰ ᱯᱚᱱᱚᱛ ᱛᱟᱭᱚᱢ ᱱᱤᱛ ᱟᱥᱟᱢ ᱯᱚᱱᱚᱛ ᱨᱮᱦᱚᱸ ᱚᱞᱪᱤᱠᱤ ᱛᱮ ᱚᱞᱚᱜ ᱯᱟᱲᱦᱟᱣ ᱮᱛᱚᱦᱚᱵᱚᱜ ᱞᱟᱹᱜᱤᱫ ᱾
ᱡᱟᱝᱜᱮ ᱫᱟᱨᱟᱢ, ᱮᱴᱠᱮᱴᱚᱬᱮ ᱠᱚᱢᱟ ᱟᱭᱢᱟ ᱢᱮᱱᱟᱜ ᱜᱮᱭᱟ ᱮᱱᱛᱮ ᱨᱮᱦᱚᱸ ᱱᱤᱛᱚᱜ ᱟᱭᱢᱟ ᱮᱪᱤᱵᱽᱢᱮᱱᱴ ᱦᱚᱸᱵᱚ ᱧᱟᱢ ᱟᱠᱟᱫ ᱜᱮᱭᱟ ᱾ ᱟᱹᱰᱤ ᱥᱟᱹᱝᱜᱤᱧ ᱵᱚ ᱦᱮᱡ ᱥᱮᱴᱮᱨ ᱟᱠᱟᱱᱟ ᱟᱨᱦᱚᱸ ᱟᱹᱰᱤ ᱥᱟᱹᱝᱜᱤᱧ ᱥᱮᱱᱚᱜ ᱨᱮᱭᱟᱜ ᱢᱮᱱᱟᱜ ᱛᱟᱵᱚᱱᱟ ᱾
ᱯᱟᱹᱨᱥᱤ ᱥᱟᱞᱟᱜ ᱪᱤᱠᱤ ᱫᱚ ᱡᱚᱲᱟᱣ ᱠᱟᱛᱮ ᱛᱟᱦᱮᱸᱱᱟ ᱾ ᱛᱮᱦᱮᱧ ᱚᱞᱪᱤᱠᱤ ᱨᱮᱭᱟᱜ ᱑᱐᱐ ᱥᱮᱨᱢᱟ ᱡᱟᱱᱟᱢ ᱢᱟᱦᱟᱸ ᱢᱟᱱᱟᱣ ᱚᱠᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱥᱟᱶ ᱚᱞᱪᱤᱠᱤ ᱫᱚ ᱟᱨᱦᱚᱸ ᱞᱟᱯᱷᱟᱝ, ᱟᱨᱦᱚᱸ ᱜᱟᱹᱦᱤᱨ, ᱟᱨᱦᱚᱸ ᱥᱟᱹᱝᱜᱤᱧ ᱨᱮ ᱥᱮᱴᱮᱨ ᱞᱟᱹᱜᱤᱫ ᱠᱤᱨᱭᱟᱹ ᱵᱚ ᱦᱟᱛᱟᱣᱟ ᱾
