ᱜᱟᱰᱟ ᱢᱩᱸᱰᱩ ᱡᱷᱟᱨᱱᱟ ᱫᱷᱟᱨᱮ, ᱟᱦᱟᱨ ᱯᱩᱠᱷᱨᱤ ᱜᱟᱹᱰᱤᱭᱟᱹ ᱰᱷᱤᱯᱨᱮ ᱟᱨ ᱠᱩᱸᱭ ᱪᱩᱣᱟᱹ ᱴᱮᱠᱚᱡ ᱟᱛᱚᱢᱨᱮ ᱧᱮᱞᱚᱜᱼᱟ ᱡᱤᱭᱟᱹᱲ ᱦᱟᱨᱭᱟᱹᱲ ᱩᱛᱩ ᱟᱲᱟᱜ ᱵᱟᱜᱟᱱ ᱟᱨ ᱵᱟᱝ ᱯᱟᱲ ᱾ ᱚᱱᱟ ᱩᱛᱩ ᱟᱲᱟᱜ ᱵᱟᱜᱟᱱ ᱮᱴᱮᱫ ᱮᱥᱮᱫ ᱠᱟᱛᱮ ᱨᱟᱠᱷᱟ ᱠᱚᱜ ᱟᱨᱵᱟᱝ ᱠᱷᱩᱞᱟᱹᱢᱮᱞᱟ ᱞᱟᱝ ᱞᱟᱝ ᱠᱚᱜ ᱯᱟᱲ ᱛᱟᱞᱟᱨᱮ ᱛᱤᱸᱜᱩ ᱠᱟᱛᱮ ᱦᱚᱨᱦᱚ ᱠᱟᱜ ᱟᱭ ᱪᱮᱫ
ᱥᱤᱧ ᱪᱮᱫ ᱧᱤᱫᱟᱹ ᱥᱟᱨᱟᱥᱟᱹᱴᱩᱜ ᱯᱟᱲ ᱨᱟᱠᱷᱟᱞ ᱾ ᱟᱡᱟᱜ ᱛᱤ ᱡᱟᱸᱜᱟ ᱟᱨ ᱦᱚᱲᱢᱚ ᱞᱳᱴ ᱛᱮ ᱵᱮᱱᱟᱣ ᱠᱟᱛᱮ ᱫᱚᱛᱚ ᱯᱟᱹᱛᱞᱩᱝ ᱦᱟᱨᱟᱲ ᱠᱚᱜᱼᱟ ᱾ ᱦᱮᱸᱫᱮ ᱴᱩᱠᱩᱡ ᱦᱟᱹᱨᱩᱵ ᱠᱚᱜ ᱵᱚᱦᱚᱜ ᱨᱮ ᱪᱟᱞᱟ ᱛᱮ ᱴᱩᱯᱨᱤ ᱠᱚᱜᱼᱟ ᱾ ᱟᱨ ᱜᱮ ᱯᱩᱸᱰ ᱨᱚᱝ ᱪᱩᱱ ᱛᱮ ᱢᱮᱫ ᱢᱩᱸ ᱢᱚᱪᱟ ᱰᱟᱴᱟ ᱜᱟᱨ ᱵᱮᱱᱟᱣ ᱠᱟᱛᱮ ᱨᱩᱯ ᱢᱚᱦᱚᱨ ᱢᱩᱴᱷᱟᱹᱱ ᱦᱚᱸᱭ ᱧᱟᱢ ᱠᱟᱜᱼᱟ ᱾ ᱚᱱᱟ ᱥᱟᱶ ᱛᱮ ᱛᱤ ᱨᱮ ᱥᱟᱵ ᱠᱟᱜ ᱟᱭ ᱢᱤᱫ ᱴᱟᱝ ᱴᱷᱩᱴᱠᱤ ᱡᱚᱱᱚᱜ ᱾
ᱚᱱᱟ ᱵᱟᱺᱰᱤ ᱵᱩᱪᱟᱹ ᱠᱷᱮᱨᱪᱚ ᱴᱷᱩᱴᱠᱤ ᱡᱚᱱᱚᱜ ᱧᱮᱞ ᱞᱮᱠᱷᱟᱱ ᱢᱚᱱᱮᱨᱮ ᱡᱚᱱᱚᱜ ᱜᱟᱜ ᱱᱟᱜᱟᱢ ᱨᱩᱯ ᱪᱤᱛᱟᱹᱨ ᱛᱟᱭ ᱩᱭᱦᱟᱹᱨ ᱡᱷᱟᱞᱠᱟᱣ ᱥᱚᱫᱚᱨᱚᱜᱼᱟ ᱾ ᱚᱠᱚᱭ ᱵᱟᱰᱚᱦᱤ ᱭᱟᱜ ᱪᱤᱭᱟᱹ ᱡᱤᱜᱟᱹᱥ ᱛᱮ ᱪᱚᱝ ᱡᱚᱱᱚᱜ ᱪᱟᱨᱮᱡ ᱤᱨ ᱟᱹᱜᱩ ᱠᱟᱛᱮ ᱦᱤᱡᱩᱜᱼᱟ ᱵᱚᱱᱮ ᱡᱷᱟᱲ, ᱴᱟᱺᱰᱤ ᱴᱤᱠᱚᱨ, ᱵᱩᱨᱩ ᱟᱲᱮ ᱠᱚᱨᱮ ᱠᱷᱚᱱ ᱟᱹᱛᱩ ᱴᱚᱞᱟ ᱚᱲᱟᱜ ᱫᱩᱣᱟᱹᱨ ᱛᱮ ᱾ ᱞᱩᱠᱩᱭ, ᱠᱷᱟᱲᱟᱝ, ᱪᱤᱨᱩ, ᱠᱤᱛᱟᱹ, ᱠᱟᱴᱠᱚᱢ ᱮᱢᱟᱱ ᱨᱚᱠᱚᱢ ᱨᱚᱠᱚᱢ ᱞᱤᱵᱚᱭ ᱞᱚᱵᱚᱭ ᱡᱚᱱᱚᱜ ᱪᱟᱨᱮᱡ ᱾ ᱡᱚᱛᱚ ᱠᱷᱚᱱ ᱢᱟᱲᱟᱝ ᱱᱚᱣᱟ ᱪᱟᱨᱮᱡ ᱵᱷᱟᱹᱜᱤ ᱥᱟᱺᱦᱤᱡ
ᱥᱤᱛᱩᱝ ᱨᱮ ᱛᱟᱥᱮ ᱨᱚᱦᱚᱲ ᱦᱩᱭᱩᱜᱼᱟ ᱾ ᱮᱱᱠᱷᱚᱱ ᱛᱮ ᱛᱚᱞ ᱵᱤᱸᱰᱟᱹ ᱠᱟᱛᱮ ᱰᱷᱩᱞᱟᱹ ᱰᱷᱤᱵᱟᱹ ᱵᱟᱝᱠᱷᱟᱱ ᱜᱟᱲᱥᱟᱸᱫᱮ ᱪᱮᱛᱟᱱ ᱨᱮ ᱨᱚᱯᱷᱟ ᱫᱚᱦᱚᱜᱼᱟ ᱾ ᱛᱟᱭᱚᱢ ᱫᱟᱨᱟᱢ ᱥᱚᱢᱚᱭ ᱥᱩᱵᱤᱫᱷᱟᱹ ᱤᱫᱤ ᱠᱟᱛᱮ ᱞᱚᱦᱚᱫ ᱧᱚᱜ ᱠᱟᱛᱮ ᱦᱤᱸᱡᱽᱨᱟᱹᱣ ᱦᱟᱣᱮᱫ ᱦᱩᱭᱩᱜᱼᱟ
᱾ ᱟᱨ ᱱᱚᱨᱚᱢ ᱞᱟᱹᱵᱤᱫ ᱠᱚᱜ ᱛᱟᱠ ᱨᱮ ᱜᱮ ᱯᱮ ᱠᱷᱤᱭᱟᱹ ᱵᱟᱝ ᱠᱷᱟᱱ ᱯᱩᱱ ᱠᱷᱤᱭᱟᱹ ᱪᱟᱨᱮᱡ ᱟᱡᱚ ᱠᱟᱛᱮ ᱜᱟᱞᱟᱝ ᱚᱼᱟᱜ ᱡᱚᱱᱚᱜ ᱾ ᱜᱟᱞᱟᱝ ᱜᱟᱞᱟᱝ ᱛᱮ ᱵᱟᱱᱟᱨ ᱛᱤ ᱞᱟᱝ ᱞᱟᱝ ᱞᱮᱠᱷᱟᱱ ᱡᱟᱦᱟᱸ ᱛᱤᱱᱟᱜ ᱡᱷᱟᱹᱞ ᱤᱱᱟᱜ ᱡᱤᱞᱤᱧ ᱦᱩᱭ ᱞᱮᱱᱠᱷᱟᱱ ᱮᱸᱰᱮ ᱜᱮ ᱜᱟᱞᱟᱝ ᱢᱩᱪᱟᱹᱫᱚᱜᱼᱟ ᱾ ᱮᱱᱠᱷᱚᱱ ᱛᱮ ᱢᱩᱪᱟᱹᱫ ᱯᱟᱦᱴᱟ ᱥᱮᱫ ᱠᱷᱚᱱ ᱯᱮᱴᱮᱨ ᱟᱹᱪᱩᱨ ᱵᱮᱫᱷᱟᱣ ᱟᱹᱜᱩ ᱠᱟᱛᱮ ᱵᱩᱲᱦᱩ ᱵᱮᱱᱟᱣ ᱦᱩᱭᱩᱜᱼᱟ ᱾ ᱵᱩᱲᱦᱩ ᱢᱩᱪᱟᱹᱫ ᱨᱮ ᱨᱮᱵᱮᱫ
ᱧᱚᱜ ᱠᱟᱛᱮ ᱯᱮᱭᱟ ᱵᱟᱝᱠᱷᱟᱱ ᱯᱩᱱᱭᱟᱹ ᱜᱟᱱ ᱪᱟᱨᱮᱡ ᱛᱮ ᱵᱮᱥ ᱴᱷᱤᱠ ᱩᱨᱤᱡ ᱥᱟᱺᱦᱤᱡ ᱛᱚᱞ ᱠᱮᱴ ᱠᱮᱴᱮ ᱞᱮᱠᱷᱟᱱ ᱜᱮ ᱦᱩᱭᱼᱟ ᱡᱚᱱᱚᱜ ᱢᱩᱴᱷᱤ ᱾
ᱱᱚᱣᱟ ᱡᱚᱱᱚᱜ ᱱᱟᱶᱟ ᱛᱟᱨᱟ ᱨᱮᱫᱚ ᱵᱷᱤᱛᱟᱹᱨ ᱫᱩᱣᱟᱹᱨ ᱨᱮ ᱟᱨ ᱡᱚᱛᱚ ᱨᱚᱠᱚᱢ ᱵᱚᱸᱜᱟ ᱵᱩᱨᱩ ᱫᱮᱵᱟ ᱥᱮᱵᱟ ᱡᱷᱚ ᱡᱚᱜ ᱠᱟᱹᱢᱤ ᱨᱮ ᱞᱟᱜᱟᱣᱼᱟ ᱾ ᱚᱸᱰᱮ ᱠᱷᱚᱱ ᱢᱤᱫ ᱫᱷᱟᱣ ᱵᱟᱹᱨᱜᱤᱞ ᱞᱮᱱᱠᱷᱟᱱ ᱟᱫᱚ ᱰᱷᱞᱟᱹ ᱞᱟᱛᱟᱨ ᱠᱚᱭ ᱡᱚᱜ ᱯᱷᱩᱨᱪᱹ ᱵᱟᱲᱟᱭᱟ ᱾ ᱚᱱᱟ ᱦᱚᱸ ᱟᱹᱰᱤ ᱢᱤᱢᱤᱫ ᱫᱷᱟᱣ ᱡᱟᱦᱟᱸ ᱛᱤᱥ ᱡᱟᱦᱟᱸ ᱛᱤᱥ ᱠᱚᱨᱮ ᱾ ᱟᱨ ᱚᱱᱟ ᱰᱷᱩᱞᱟᱹ ᱞᱟᱛᱟᱨ ᱥᱮᱫ ᱨᱮᱜᱮ ᱛᱟᱦᱮᱸ ᱠᱚᱜ ᱟᱭ ᱧᱩᱛ ᱨᱮ ᱾ ᱛᱤᱥ ᱨᱮ ᱢᱟᱨᱥᱟᱞ ᱜᱮ ᱵᱟᱭ ᱧᱮᱞ ᱡᱚᱝᱼᱟ ᱾
ᱚᱠᱛᱚ ᱥᱮᱴᱮᱨᱚᱜᱼᱟ ᱢᱤᱫ ᱫᱤᱱ ᱱᱩᱭ ᱡᱚᱱᱚᱜ ᱰᱷᱩᱞᱟᱹ ᱞᱟᱛᱟᱨ ᱠᱷᱚᱱ ᱚᱰᱚᱠᱚᱜᱼᱟᱭ ᱟᱨ ᱚᱲᱟᱜ ᱫᱩᱣᱟᱹᱨ ᱜᱚᱴᱟ ᱡᱚᱜ ᱯᱷᱩᱨᱪᱟᱹ ᱭᱟᱭ ᱾ ᱫᱤᱱ ᱜᱮ ᱱᱚᱝᱠᱟ ᱡᱚᱜ ᱯᱷᱩᱨᱪᱟᱹ ᱠᱟᱛᱮ ᱥᱟᱯᱷᱟ ᱥᱩᱛᱟᱹᱨ ᱫᱚᱦᱚ ᱭᱟᱭ ᱚᱲᱟᱜ ᱵᱷᱤᱛᱟᱹᱨ ᱨᱮᱱᱟᱜ ᱡᱚᱛᱚ ᱠᱟᱱᱫᱷᱟ ᱾ ᱩᱭᱩᱝ ᱠᱚᱵᱚᱜ ᱠᱮᱫ ᱞᱮᱠᱟ ᱫᱩᱣᱟᱹᱨ ᱴᱷᱮᱱ ᱫᱷᱟᱹᱵᱤᱡ ᱡᱚᱜ ᱵᱟᱲᱟ ᱠᱟᱛᱮ ᱟᱨᱦᱚᱸᱭ ᱜᱷᱩᱨ ᱨᱩᱣᱟᱹᱲᱚᱜᱼᱟ ᱾ ᱟᱨ ᱥᱤᱞᱯᱤᱧ ᱠᱚᱪᱟ ᱥᱮᱫ ᱨᱮ ᱩᱠᱩ ᱟᱠᱟᱱ ᱞᱮᱠᱟᱭ
ᱛᱟᱦᱮᱸ ᱠᱚᱜᱼᱟ ᱾ ᱠᱟᱹᱴᱤᱡ ᱦᱮᱲ ᱪᱷᱮᱪᱨᱮ ᱟᱫᱷᱚᱲᱚᱜ ᱫᱷᱟᱹᱨᱤᱡ ᱫᱚ ᱱᱚᱝᱠᱟ ᱜᱮ ᱚᱲᱟᱜ ᱨᱮ ᱵᱚᱞᱚ ᱵᱟᱭ ᱠᱚᱜ ᱟᱭ ᱾
ᱫᱤᱱ ᱫᱤᱱ ᱵᱟᱹᱭ ᱵᱟᱹᱭ ᱛᱮ ᱟᱫᱷᱟ ᱟᱫᱷᱚᱲ ᱞᱮᱱᱠᱷᱟᱱᱮ ᱱᱩᱭ ᱡᱚᱱᱚᱜ ᱚᱲᱟᱜ ᱠᱷᱚᱱ ᱚᱰᱚᱠ ᱠᱟᱛᱮ ᱨᱟᱪᱟ ᱪᱷᱟᱴᱠᱟ ᱠᱚᱭ ᱡᱚᱜ ᱯᱷᱩᱨᱪᱟᱹᱭᱟ ᱾ ᱥᱮᱛᱟᱜ ᱛᱟᱨᱟ ᱠᱷᱚᱱ ᱥᱟᱨᱟᱲ ᱥᱟᱨᱟᱲ ᱥᱟᱰᱮ ᱥᱟᱶᱛᱮ ᱾ ᱟᱰᱮᱯᱟᱥᱮ ᱠᱚᱨᱤᱱ ᱦᱚᱲ ᱥᱟᱰᱮ ᱟᱸᱡᱚᱢ ᱛᱮ ᱠᱚ ᱯᱚᱨᱚᱠ ᱵᱟᱰᱟᱭ ᱫᱟᱲᱮᱭᱟᱜᱼᱟ ᱯᱷᱟᱞᱱ ᱛᱮᱠᱚᱣᱟᱜ ᱨᱟᱪᱟ ᱡᱚᱜᱚᱜ ᱠᱟᱱᱟ ᱢᱮᱱᱛᱮ ᱾ ᱥᱮᱛᱟᱜ ᱟᱨ ᱟᱹᱭᱩᱵ ᱵᱮᱲᱟ ᱢᱟ ᱠᱷᱚᱸᱡᱟ ᱦᱟᱠᱟᱱ ᱞᱮᱠᱟ ᱡᱚᱜᱽ ᱟᱭ ᱥᱟᱶᱛᱮ ᱡᱟᱦᱟᱸ ᱛᱤᱱ ᱨᱮᱜᱮ ᱚᱡᱽᱨᱟ ᱡᱚᱵᱽᱨᱟᱜ ᱠᱷᱟᱱ ᱨᱟᱪᱟ ᱪᱷᱟᱴᱠᱟ ᱩᱱᱨᱮᱜᱮ
ᱡᱚᱜ ᱯᱷᱩᱨᱪᱟᱹ ᱭᱟᱭ ᱾ ᱡᱚᱜ ᱥᱟᱹᱛ ᱞᱮᱠᱷᱟᱱ ᱢᱩᱛᱩᱞ ᱵᱟᱝᱠᱷᱟᱱ ᱠᱩᱰᱟᱹᱢ ᱯᱤᱸᱰᱟᱹ ᱥᱮᱫ ᱨᱮ ᱫᱟᱢᱯᱟ ᱫᱟᱲᱟᱝ ᱜᱚᱞᱴᱷᱟᱣ ᱥᱟᱸᱰᱟᱝ ᱜᱤᱰᱤ ᱠᱚᱜ ᱟᱭ ᱾
ᱟᱨ ᱠᱤᱪᱷᱩ ᱫᱤᱱ ᱛᱟᱭᱚᱢ ᱱᱩᱭ ᱡᱚᱱᱚᱜ ᱟᱨᱦᱚᱸᱭ ᱦᱮᱲ ᱴᱷᱮᱰᱜᱮ ᱤᱫᱤ ᱞᱮᱱᱠᱷᱟᱱ ᱜᱚᱲᱟ ᱨᱮ ᱯᱟᱹᱨᱤ ᱡᱚᱜ ᱡᱚᱜ ᱮ ᱜᱟᱱᱚᱜᱼᱟ ᱾ ᱠᱷᱟᱴᱚ ᱚᱠᱚᱡ ᱦᱩᱰᱤᱧ ᱦᱩᱰᱤᱧ ᱦᱚᱲᱢᱚ ᱛᱮ ᱪᱷᱩᱨᱩᱠ ᱪᱷᱩᱨᱩᱠ ᱥᱟᱰᱮ ᱥᱟᱶᱛᱮ ᱜᱚᱲᱟ ᱨᱮᱱᱟᱜ ᱰᱷᱚᱰᱟ ᱰᱷᱤᱯᱟᱹᱭ ᱡᱚᱜ ᱯᱷᱩᱨᱪᱟ,ᱭᱟ ᱾ ᱡᱚᱜ ᱦᱩᱭ ᱞᱮᱠᱷᱟᱱᱮ ᱜᱚᱲᱟ ᱫᱩᱣᱟᱹᱨ ᱥᱩᱨ ᱨᱮ ᱴᱮᱱᱰᱟᱨ ᱠᱟᱛᱮ ᱛᱤᱸᱜᱩ ᱠᱚᱜ ᱟᱭ ᱾ ᱪᱤᱞᱤ ᱪᱟᱣᱠᱤᱫᱟᱨ ᱪᱮ ᱫᱚᱨᱣᱟᱱ ᱛᱟᱹᱱᱤᱡ ᱫᱩᱣᱟᱹᱨ ᱥᱤᱞᱯᱤᱧ ᱴᱷᱮᱱ
ᱠᱚ ᱦᱚᱨᱦᱚ ᱠᱟᱜ ᱞᱮᱠᱟ ᱾ ᱟᱡᱟᱜ ᱴᱷᱟᱶ ᱨᱮ ᱟᱨ ᱢᱤᱫ ᱴᱟᱝ ᱠᱷᱟᱺᱰᱤᱭᱟᱹ ᱠᱷᱮᱨᱪᱚ ᱡᱚᱱᱚᱜ ᱦᱮᱡ ᱞᱮᱱᱠᱷᱟᱱ ᱱᱩᱭ ᱭᱟᱜ ᱫᱚ ᱡᱤᱨᱟᱹᱣ ᱚᱠᱛᱚ ᱥᱮᱴᱮᱨᱚᱜᱼᱟ ᱾ ᱤᱱᱟᱜ ᱛᱮ ᱫᱚᱭ ᱴᱷᱩᱴᱠᱤ ᱥᱟᱹᱛ ᱦᱟᱛᱟᱲ ᱠᱚᱜᱼᱟ ᱾ ᱚᱱᱟ ᱛᱮ ᱯᱟᱲ ᱛᱟᱞᱟᱨᱮ ᱯᱟᱲ ᱨᱟᱠᱷᱟᱞᱟᱜ ᱛᱤ ᱨᱮ ᱥᱟᱵ ᱥᱮᱯᱮᱧ ᱠᱟᱛᱮ ᱡᱤᱨᱟᱹᱩ ᱠᱚᱜ ᱟᱭ ᱾ ᱯᱟᱲ ᱨᱟᱠᱷᱟᱞ ᱥᱟᱶ ᱯᱟᱲ ᱨᱮᱱᱟᱜ ᱪᱟᱥ ᱠᱤᱨᱥᱤ ᱠᱤᱱ ᱦᱚᱨᱦᱚ ᱠᱟᱜᱼᱟ ᱴᱷᱟᱭ ᱴᱷᱟᱭ ᱥᱤᱛᱩᱝ ᱨᱮ, ᱠᱟᱱᱠᱟᱱᱟᱣ ᱛᱩᱠᱩᱱ ᱨᱟᱵᱟᱝ ᱨᱮ ᱟᱨ ᱦᱚᱸ ᱡᱟᱨᱜᱮ ᱡᱷᱚᱢᱚᱨ ᱡᱟᱹᱲᱤ ᱨᱮ᱾
ᱯᱟᱲ ᱨᱟᱠᱷᱟᱞᱟᱜ ᱛᱤ ᱨᱮ ᱴᱷᱩᱴᱠᱤ ᱡᱚᱱᱚᱜ ᱧᱮᱞ ᱛᱮ ᱡᱤᱣᱤ ᱡᱤᱭᱟᱹᱞᱤ ᱟᱨ ᱪᱮᱬᱮᱸ ᱪᱤᱯᱨᱩᱫ ᱫᱚᱠᱚ ᱠᱚ ᱵᱷᱟᱹᱵᱤᱭᱟ ᱠᱷᱮᱛ ᱠᱤᱥᱟᱺᱬ ᱜᱮ ᱴᱷᱮᱸᱜᱟ ᱪᱮ ᱠᱷᱟᱵᱽᱲ ᱥᱟᱵ ᱠᱟᱛᱮ ᱟᱠᱚ ᱦᱟᱹᱲᱤ ᱨᱩᱣᱟᱹᱲ ᱞᱟᱜᱟ ᱯᱷᱟᱨᱟᱠ ᱞᱟᱹᱜᱤᱫ ᱦᱚᱨᱦᱚ ᱟᱠᱟᱫᱟᱭ ᱩᱛᱩ ᱟᱲᱟᱜ ᱯᱟᱲ ᱛᱟᱭ ᱾ ᱚᱱᱟᱛᱮ ᱜᱟᱹᱭ, ᱰᱟᱨᱟ, ᱢᱮᱨᱚᱢ, ᱵᱷᱤᱰᱤ ᱞᱤᱠᱤᱫ ᱞᱤᱠᱤᱫ ᱦᱟᱹᱨᱭᱟᱹᱲ ᱯᱟᱲ ᱟᱹᱛᱤᱧ ᱩᱡᱟᱹᱲ ᱠᱚ ᱵᱚᱛᱚᱨᱚᱜᱼᱟ ᱾ ᱪᱮᱬᱮᱸ ᱪᱤᱯᱨᱩᱫ ᱠᱚᱦᱚᱸ ᱡᱚ, ᱵᱟᱦᱟ ᱴᱷᱚᱴᱨᱟᱣ ᱥᱚᱴᱚ ᱠᱚ ᱵᱚᱨᱚᱜᱼᱟ ᱾ ᱟᱨᱜᱮ ᱧᱩᱛ ᱧᱤᱫᱟᱹ ᱛᱮᱨᱫᱮᱡ ᱢᱟᱨᱥᱟᱞ ᱨᱮ ᱛᱩᱭᱩ, ᱠᱷᱤᱠᱲᱤ, ᱵᱟᱱᱟ ᱮᱢᱟᱱ ᱧᱤᱫᱟᱹ ᱫᱟᱬᱟᱱ ᱡᱤᱭᱟᱹᱞᱤ ᱠᱚᱦᱚᱸ ᱚᱠᱚᱭ ᱪᱚᱝ ᱛᱤ ᱨᱮ ᱦᱟᱹᱛᱤᱭᱟᱹᱨ ᱥᱟᱵ ᱠᱟᱛᱮ ᱛᱤᱸᱜᱩ ᱟᱠᱟᱱ ᱞᱮᱠᱟ ᱠᱚ ᱧᱮᱞ ᱵᱷᱮᱣᱱᱟᱜᱼᱟ᱾ ᱚᱱᱟᱛᱮ ᱵᱟᱦᱟ, ᱡᱚ ᱵᱤᱞᱤ, ᱠᱚᱨᱮᱱᱟᱜ ᱥᱚᱸᱫᱷᱟᱬ ᱦᱮᱲᱮᱢ ᱥᱤᱵᱤᱞ ᱥᱚ ᱠᱚ ᱨᱮᱦᱚᱸ ᱯᱟᱲ ᱵᱚᱞᱚᱜ ᱵᱟᱠᱚ ᱵᱷᱚᱨᱥᱟᱭᱟ ᱾ ᱠᱷᱮᱛ ᱠᱤᱥᱟᱺᱬ ᱦᱚᱸ ᱯᱟᱲ ᱨᱟᱠᱷᱟᱞᱟᱜ ᱛᱤ ᱨᱮ ᱢᱤᱫ ᱴᱟᱝ ᱥᱟᱯᱟᱵ ᱜᱮ ᱢᱮᱱ ᱢᱮ ᱴᱷᱩᱴᱠᱤ ᱡᱚᱱᱚᱜ ᱪᱟᱞ ᱠᱟᱛᱮ ᱯᱟᱲ ᱦᱟᱣᱟᱞ ᱟᱭᱛᱮ ᱟᱡ ᱫᱚ ᱱᱤᱯᱷᱤᱠᱤᱨ ᱱᱤᱨᱡᱟᱞᱟ ᱚᱲᱟᱜ ᱨᱮ ᱛᱟᱦᱮᱸ ᱠᱚᱜ ᱟᱭ ᱾
ᱟᱸᱜᱟ ᱢᱟᱨᱥᱟᱞ ᱥᱮᱛᱟᱜ ᱛᱟᱨᱟ ᱠᱷᱚᱱ ᱧᱩᱸᱛ ᱧᱤᱫᱟᱹ ᱡᱟᱹᱯᱤᱫ ᱫᱷᱟᱹᱨᱤᱡ ᱡᱚᱛᱚ ᱚᱲᱟᱜ ᱨᱮ ᱠᱷᱚᱡᱟᱨᱚᱜᱼᱟᱭ ᱡᱚᱱᱚᱜ ᱾ ᱚᱱᱠᱟ ᱜᱮ ᱡᱚᱛᱚ ᱨᱚᱠᱚᱢ ᱵᱚᱸᱜᱟ ᱵᱩᱨᱩ ᱥᱮᱵᱟ ᱥᱮᱨᱣᱟ ᱡᱷᱚᱜ ᱱᱟᱶᱟ ᱡᱚᱱᱚᱜ ᱞᱟᱠᱛᱤᱼᱟ ᱾ ᱟᱨ ᱜᱮ ᱡᱟᱦᱟᱱ ᱱᱟᱬᱟ ᱯᱤᱲᱟᱹ
ᱠᱷᱚᱱᱰᱚᱱ ᱯᱟᱛᱚᱠ ᱚᱰᱚᱠ ᱜᱤᱰᱤ ᱡᱷᱚᱜ ᱦᱚᱸ ᱠᱷᱚᱡᱟᱨᱚᱜᱼᱟᱭ ᱴᱷᱩᱴᱠᱤ ᱡᱚᱱᱚᱜ ᱾ ᱱᱩᱭ ᱡᱚᱱᱚᱜ ᱵᱩᱜᱤᱭᱟᱜ ᱠᱟᱹᱢᱤ ᱥᱟᱨ ᱥᱟᱹᱜᱩᱱ ᱥᱟᱶᱛᱮ ᱵᱟᱲᱤᱡᱟᱜ ᱦᱚᱸᱭ ᱵᱷᱟᱹᱜᱤ ᱚᱪᱚᱭᱟ᱾ ᱡᱚᱱᱚᱜ ᱫᱚ ᱨᱩᱯ ᱜᱚᱲᱦᱚᱱ ᱟᱨ ᱵᱟᱝ ᱢᱤᱫ ᱴᱟᱝ ᱡᱚᱱᱚᱢ ᱧᱟᱢ ᱟᱠᱟᱫ ᱠᱷᱚᱱ ᱵᱷᱤᱛᱟᱹᱨ ᱫᱩᱣᱟᱹᱨ , ᱰᱷᱩᱞᱟᱹ ᱞᱟᱛᱟᱨ, ᱚᱲᱟᱜ ᱠᱟᱸᱫᱷᱟ, ᱨᱟᱪᱟ ᱪᱷᱟᱴᱠᱟ, ᱜᱚᱲᱟ ᱜᱩᱨᱤᱡ ᱡᱚᱜ ᱯᱷᱩᱨᱪᱟᱹ ᱟᱨ ᱵᱟᱹᱲᱤᱡ ᱫᱚᱥᱟ ᱥᱟᱦᱟ ᱜᱤᱰᱤ ᱠᱟᱹᱢᱤᱨᱮ ᱞᱟᱜᱟᱣ ᱠᱚᱜ ᱟᱭ ᱾ ᱚᱱᱛᱮ ᱫᱚ ᱡᱚᱛᱚᱱ ᱥᱟᱺᱦᱤᱡ ᱰᱷᱩᱞᱟᱹ ᱞᱟᱛᱟᱨ ᱨᱮᱠᱚ ᱫᱚᱦᱚ ᱠᱟᱭ ᱾ ᱟᱨ ᱵᱟᱝ ᱚᱲᱟᱜ ᱵᱷᱤᱛᱟᱹᱨ ᱥᱤᱞᱯᱤᱧ ᱠᱚᱪᱟ ᱨᱮᱠᱚ ᱛᱟᱥᱲᱟᱣ ᱠᱟᱭ ᱾ ᱵᱟᱝ ᱠᱷᱟᱱ ᱢᱩᱛᱩᱞ ᱟᱨ ᱠᱩᱰᱟᱹᱢ ᱯᱤᱸᱰᱟ ᱥᱮᱫ ᱠᱚᱨᱮᱠᱚ ᱦᱩᱨᱞᱟᱹ ᱪᱟᱯᱟᱫ ᱠᱟᱭ ᱾ ᱟᱨ ᱜᱮ ᱜᱚᱲᱟ
ᱫᱩᱣᱟᱹᱨ ᱴᱷᱮᱱ ᱠᱚ ᱴᱮᱸᱰᱟᱨ ᱴᱮᱥᱟ ᱠᱟᱭ, ᱛᱟᱭ ᱟᱹᱛᱩ ᱢᱩᱪᱟᱹᱫ ᱥᱤᱢᱟᱹ ᱯᱷᱟᱨᱟᱠ ᱨᱮᱠᱚ ᱞᱮᱣᱫᱟ ᱜᱤᱰᱤ ᱠᱟᱭ᱾ ᱚᱱᱟ ᱠᱷᱟᱹᱛᱤᱨ ᱡᱚᱱᱚᱜ ᱜᱟᱜ ᱠᱚᱱᱚ ᱫᱩᱠ ᱵᱷᱟᱵᱽᱱᱟ ᱵᱟᱹᱱᱩᱜ ᱟᱱ ᱛᱟᱭᱟ ᱾ ᱱᱟᱣᱟ ᱨᱮ ᱡᱟᱦᱟᱸ ᱞᱮᱟᱠᱭ ᱠᱟᱹᱢᱤ ᱠᱟᱱ ᱛᱟᱦᱮᱱ ᱨᱩᱯ ᱫᱟᱱᱟᱝ ᱟᱨ ᱫᱟᱲᱮ ᱪᱟᱵᱟ ᱠᱟᱛᱮ ᱦᱚᱸ ᱚᱱᱠᱟ ᱜᱮ ᱠᱟᱹᱢᱤ ᱨᱮ ᱪᱷᱩᱴᱟᱹᱣ ᱠᱚᱜ ᱟᱭ ᱟᱡᱟᱜ ᱠᱚᱨᱢᱚ ᱨᱮ ᱟᱨ ᱵᱟᱝ ᱥᱮᱵᱟ ᱨᱮ ᱾
ᱡᱚᱱᱚᱜ ᱟᱡᱟᱜ ᱡᱤᱵᱚᱱ ᱠᱟᱲᱨᱮ ᱫᱟᱲᱮ ᱟᱨ ᱟᱫᱷᱚᱲ ᱩᱢᱮᱨ ᱨᱮ ᱟᱹᱰᱤ ᱜᱚᱴᱟᱝ ᱴᱷᱟᱶ ᱡᱟᱭᱜᱟ ᱥᱟᱶ ᱥᱟᱹᱜᱟᱹᱭ ᱡᱚᱲᱟᱣ ᱠᱟᱜ ᱟᱭ ᱾ ᱮᱱ ᱦᱚᱸ ᱱᱩᱭ ᱯᱟᱲ ᱨᱟᱠᱷᱟᱞ ᱥᱟᱞᱟᱜ ᱟᱡᱟᱜ ᱥᱟᱹᱜᱟᱹᱭ ᱛᱟᱭ ᱫᱚ ᱟᱹᱰᱤ ᱥᱩᱞᱩᱠ ᱟᱨ ᱡᱩᱫᱟᱹ ᱦᱟ ᱾ ᱪᱮᱫᱟᱜ ᱥᱮ ᱠᱷᱟᱺᱰᱤᱭᱟᱹ ᱠᱷᱮᱨᱪᱚ ᱪᱷᱮᱪᱨᱮ, ᱴᱷᱩᱴᱠᱤ ᱨᱩᱯᱨᱮ ᱨᱮᱦᱚᱸ ᱛᱤ ᱨᱮ ᱥᱟᱵ ᱥᱮᱯᱮᱧ ᱠᱟᱭᱟᱭ ᱾ ᱡᱮᱢᱚᱱ ᱡᱚᱱᱚᱜ ᱟᱡᱟᱜ ᱡᱤᱵᱚᱱ ᱵᱷᱩᱨ ᱥᱮᱵᱟ ᱮᱱᱮᱢ ᱟᱞᱟᱭ ᱠᱷᱟᱹᱛᱤᱨ ᱜᱮ ᱥᱟᱨᱦᱟᱣ ᱢᱟᱹᱱ ᱩᱢᱟᱹᱬ ᱪᱟᱞ ᱟᱭ ᱠᱟᱱᱟᱭ ᱥᱚᱸᱥᱟᱨ ᱥᱟᱢᱟᱝ ᱨᱮ ᱾ ᱥᱟᱶᱛᱮ ᱫᱤᱥᱚᱢ ᱦᱚᱲ ᱠᱚᱭ ᱩᱫᱩᱜ ᱥᱚᱫᱚᱨ ᱟᱠᱚ ᱠᱟᱱᱟ ᱡᱤᱵᱚᱱ ᱨᱮᱱᱟᱜ ᱢᱟᱱᱮ ᱫᱚ ᱠᱚᱨᱢᱚ ᱾ ᱠᱚᱨᱢᱚ ᱨᱮᱜᱮ ᱢᱮᱱᱟᱜᱼᱟ ᱥᱮᱵᱟ ᱾ ᱥᱮᱵᱟ ᱦᱚᱛᱮ ᱛᱮᱜᱮ ᱥᱩᱠ, ᱥᱤᱨᱯᱷᱟᱹ ᱟᱨ ᱥᱟᱨᱣᱟᱣ ᱦᱚᱸ
ᱧᱟᱢᱚᱜᱼᱟ ᱾
