ᱰᱤᱜᱽ ᱰᱤᱜᱽ ᱢᱟᱨᱥᱟᱞ
ᱛᱚᱞᱟᱥ ᱮᱫᱟᱭ ᱛᱟᱥᱮ ᱛᱟᱥᱮ ᱛᱮᱨᱫᱮᱡ,
ᱧᱩᱞᱩ ᱧᱩᱞᱩ ᱰᱤᱵᱟᱹ ᱥᱮᱸᱜᱮᱞ
ᱤᱸᱬᱤᱡᱚᱜ ᱵᱟᱝ ᱥᱟᱱᱟᱭᱮ ᱠᱟᱱᱟ
ᱫᱟᱭᱟ ᱜᱮ…..
ᱡᱤᱣᱤ ᱨᱮᱭᱟᱜ ᱵᱳᱨᱥᱮ ᱥᱮᱸᱜᱮᱞ
ᱥᱮᱨᱢᱟ ᱨᱮᱱ ᱤᱯᱤᱞ ᱮᱸᱜᱮᱞ,
ᱵᱤᱪᱷᱚᱠ ᱢᱚᱱᱮ ᱨᱮᱭᱟᱜ ᱵᱩᱴᱩᱧ ᱦᱟᱥᱳ
ᱚᱠᱚᱭᱮ ᱥᱟᱦᱟᱣᱟᱼᱟ ?
ᱯᱟᱲᱟᱜ ᱵᱷᱤᱨᱚ ᱵᱷᱚᱨᱚ ᱦᱟᱥᱟ ᱞᱮᱠᱟ ᱡᱤᱣᱤ
ᱚᱠᱚᱭᱮ ᱵᱟᱰᱟᱭ
ᱚᱠᱟᱨᱮ ᱪᱚ ᱛᱮᱱ ᱟᱠᱟᱱᱟ ?
ᱡᱤᱣᱤ ᱨᱮᱭᱟᱜ ᱚᱜᱚᱢ ᱫᱚᱨᱭᱟ ᱨᱮ
ᱟᱢᱮᱢ ᱯᱟᱭᱨᱟ ᱞᱮᱱᱟ ᱢᱤᱫ ᱫᱤᱱ;
ᱟᱭ ᱩᱢᱟᱹᱱ ᱞᱮᱫᱟᱢ
ᱫᱷᱟᱨᱹᱛᱤ ᱴᱩᱸᱰᱟᱹᱝ ᱴᱩᱸᱰᱟᱹᱝ
ᱥᱟᱨᱩ ᱥᱟᱠᱟᱢ ᱫᱟᱜ ᱞᱮᱠᱟ ᱡᱤᱣᱤ ᱾
ᱥᱚᱱᱮᱜᱚᱲ ᱥᱤᱠᱲᱤ ᱛᱚᱯᱟᱜ ᱠᱟᱛᱮᱜ
ᱵᱟᱦᱟᱜᱚᱲ ᱵᱟᱸᱫᱮᱞᱟᱭ ᱫᱟᱸᱬᱟ ᱟᱜᱩ ᱠᱟᱛᱮᱜ,
ᱟᱢᱮᱢ ᱜᱚᱴᱟ ᱞᱮᱫᱟ ᱥᱩᱨᱩᱡᱽᱢᱩᱱᱤ
ᱤᱧᱟᱜ ᱫᱩᱞᱟᱹᱲ ᱫᱷᱟᱨᱹᱛᱤᱢ ᱥᱟᱸᱜᱷᱟᱨᱟ ᱢᱮᱱᱛᱮ᱾
ᱰᱤᱜᱽ ᱰᱤᱜᱽ ᱢᱟᱨᱥᱟᱞ
ᱯᱟᱱᱛᱮ ᱧᱟᱢ ᱠᱮᱫᱟᱭ ᱛᱟᱥᱮ ᱛᱟᱥᱮ ᱛᱮᱨᱫᱮᱡ
ᱧᱩᱞᱩ ᱧᱩᱞᱩ ᱰᱤᱵᱟᱹ ᱥᱮᱸᱜᱮᱞ
ᱤᱸᱬᱤᱡᱻᱮᱱ ᱜᱮᱭᱟ
ᱫᱟᱭᱟ ᱜᱮ !
ᱫᱷᱤᱨᱤ ᱠᱟᱯᱟᱴ ᱡᱷᱤᱡ ᱠᱟᱛᱮᱫ
ᱯᱟᱱᱛᱮ ᱞᱮᱫᱟᱢ ᱫᱩᱞᱟᱹᱲ,
ᱵᱟᱢ ᱤᱫᱤ ᱨᱩᱣᱟᱹᱲ ᱫᱟᱲᱮᱭᱟᱫᱟ
ᱟᱢᱟᱜ ᱛᱮᱱ ᱟᱠᱟᱱ ᱡᱤᱣᱤ….. !
