ᱟᱹᱛᱩᱜ ᱠᱟᱱ ᱛᱟᱢ ᱡᱟᱱᱟᱢ ᱫᱤᱥᱚᱢ,
ᱚᱠᱚᱭ ᱛᱟᱢ ᱢᱟᱥᱮ ᱚᱣᱟᱨ;
ᱢᱟᱞᱚᱴᱚᱜ ᱠᱟᱱ ᱛᱟᱢ ᱡᱟᱹᱛᱤ ᱯᱟᱹᱨᱤᱥ,
ᱚᱠᱚᱭ ᱮ ᱦᱤᱡᱩᱜ ᱢᱟᱥᱮ ᱥᱟᱶᱟᱨ !
ᱧᱩ ᱵᱩᱞ ᱛᱚᱦᱮᱞ ᱠᱟᱛᱮ,
ᱟᱢ ᱢᱟᱢ ᱥᱟᱡᱟᱣᱮᱱ ᱢᱟᱥᱮ ᱵᱟᱣᱟᱨ;
ᱵᱟᱝ ᱮᱢ ᱩᱨᱩᱢᱮᱫ ᱛᱟᱢᱟ ᱟᱹᱫᱤᱢ,
ᱟᱹᱛᱩᱜ ᱠᱟᱱ ᱛᱟᱢ ᱫᱤᱥᱚᱢ ᱰᱟᱦᱟᱨ !
ᱥᱩᱜ-ᱥᱩᱛᱩᱜ ᱠᱚ ᱧᱟᱢᱮᱫ ᱛᱟᱢ,
ᱞᱟᱭᱮᱫ ᱛᱟᱢ ᱠᱚ ᱵᱟᱹᱫᱽ-ᱟᱦᱟᱨ;
ᱠᱷᱟᱫᱟ-ᱵᱟᱫᱟ ᱠᱚ ᱢᱟᱜᱮᱫ ᱛᱟᱢ,
ᱵᱟᱹᱭᱨᱤ ᱠᱚ ᱪᱷᱩᱴᱟᱹᱣᱮᱱ ᱥᱚᱢᱟᱡᱽ ᱜᱟᱸᱰᱟᱨ !
ᱟᱴᱟᱵ-ᱡᱟᱲᱟᱵ ᱟᱢ ᱫᱚᱢ ᱛᱟᱦᱮᱸᱭᱮᱱ,
ᱪᱮᱠᱟ ᱚᱸᱰᱚᱠᱚᱜ ᱛᱟᱢᱟ ᱰᱷᱮᱠᱟᱨ;
ᱨᱮᱸᱜᱮᱡ – ᱛᱮᱛᱟᱝ ᱡᱟᱞᱟᱫ -ᱡᱟᱯᱟᱫ,
ᱡᱚᱱᱚᱢ ᱟᱱᱟᱢ ᱟᱢ ᱫᱚ ᱟᱡᱟᱨ !
ᱚᱜᱚᱢ ᱫᱚᱨᱭᱟ ᱢᱟᱨᱟᱝ ᱞᱮᱠᱟ,
ᱫᱤᱥᱚᱢ ᱦᱚᱸ ᱛᱟᱦᱮᱸ ᱠᱟᱱ ᱛᱟᱢᱟ ᱚᱥᱟᱨ;
ᱚᱲᱟᱜ ᱯᱮᱨᱮᱡ ᱰᱷᱩᱞᱟᱹ-ᱵᱟᱺᱫᱤ,
ᱫᱷᱚᱱ ᱦᱚᱸ ᱛᱟᱦᱮᱸ ᱠᱟᱱ ᱛᱟᱢᱟ ᱥᱟᱦᱟᱨ !
ᱡᱩᱢᱤᱫ ᱫᱟᱲᱮ ᱵᱟᱹᱱᱩᱜ ᱛᱮ,
ᱵᱟᱹᱭᱨᱤ ᱠᱚ ᱪᱷᱩᱴᱟᱹᱣᱮᱱ ᱡᱷᱟᱹᱞᱤ ᱛᱮᱭᱟᱨ;
ᱦᱤᱸᱥᱟ-ᱥᱩᱭᱟᱹ ᱰᱮᱦᱮᱨ ᱛᱟᱢ ᱛᱮ,
ᱛᱟᱦᱮᱸ ᱭᱮᱱᱟᱢ ᱟᱢ ᱫᱚ ᱵᱷᱮᱜᱟᱨ !
ᱴᱟᱠᱟ-ᱯᱩᱭᱥᱟ ᱛᱟᱦᱮᱸᱱ ᱛᱩᱞᱩᱡ,
ᱟᱢ ᱫᱚᱢ ᱥᱟᱡᱟᱣᱮᱱ ᱰᱚᱢ ᱠᱟᱢᱟᱨ;
ᱦᱮᱲᱮᱢ -ᱥᱤᱵᱤᱞ ᱠᱟᱥᱟ ᱠᱮᱫ ᱢᱮ,
ᱚᱰᱚᱠ ᱮᱱᱟᱢ ᱱᱟᱞᱦᱟ ᱵᱟᱡᱟᱨ !
ᱥᱚᱱᱟ ᱞᱮᱠᱟᱱ ᱡᱟᱱᱟᱢ ᱫᱤᱥᱚᱢ ᱨᱮ,
ᱵᱚᱲᱦᱮ ᱭᱮᱱᱟᱢ ᱫᱤᱠᱩ ᱡᱚᱦᱟᱨ;
ᱡᱚᱛᱚᱣᱟᱜ ᱛᱟᱦᱮᱸᱱ ᱛᱩᱞᱩᱡ ᱟᱢᱫᱚ,
ᱛᱟᱦᱮᱸ ᱭᱮᱱᱟᱢ ᱟᱢ ᱫᱚ ᱞᱟᱛᱟᱨ !
ᱥᱤᱧ- ᱧᱤᱫᱟᱹ ᱠᱷᱟᱴᱟᱣ ᱠᱟᱛᱮ,
ᱩᱠᱩᱨ ᱟᱱ ᱛᱟᱢ ᱛᱤ ᱨᱮ ᱯᱟᱜᱟᱨ ;
ᱰᱟᱺᱜᱽᱨᱤ-ᱠᱟᱰᱟ ᱞᱮᱠᱟ ᱵᱩᱨᱩᱢ ,
ᱯᱟᱲᱟᱣᱮᱱᱟᱢ ᱟᱢ ᱫᱚ ᱯᱟᱦᱟᱨ !
ᱦᱮᱲᱮᱢ ᱡᱚᱢ ᱢᱟ ᱠᱟᱥᱟ ᱠᱮᱫ ᱢᱮ,
ᱯᱟᱲᱟᱣ ᱠᱮᱜ ᱟᱢ ᱡᱚᱡᱚ-ᱟᱪᱟᱨ ;
ᱱᱤᱛᱚᱜ ᱮᱢ ᱩᱨᱩᱢᱮᱫ ᱛᱟᱢᱟ ᱟᱹᱫᱤᱢ,
ᱡᱚᱛᱚᱠᱷᱚᱱ ᱱᱤᱫᱷᱟᱹᱱ ᱱᱟᱪᱟᱨ !
ᱪᱷᱤᱛᱤ-ᱵᱤᱛᱤ ᱭᱮᱱ ᱛᱟᱢ ᱥᱚᱱᱟ ᱫᱤᱥᱚᱢ,
ᱟᱢ ᱵᱮᱱᱟᱣ ᱥᱚᱱᱮᱨ ᱠᱷᱟᱧᱪᱟᱨ;
ᱚᱠᱛᱚ ᱟᱹᱣᱨᱤ ᱥᱮᱴᱮᱨᱚᱜ ᱨᱮᱜᱮ,
ᱟᱫ ᱠᱮᱜ-ᱟᱢ ᱟᱭᱳ ᱟᱧᱪᱟᱨ !
ᱞᱮᱜᱫᱟ ᱜᱤᱰᱤ ᱟᱢ ᱫᱚᱢ ᱛᱟᱦᱮᱸᱭᱮᱱ ,
ᱫᱟᱹᱛᱟᱹᱣᱱᱤ ᱥᱟᱨᱮᱡ ᱠᱟᱰᱮᱡ ᱦᱟᱛᱟᱨ ;
ᱞᱚ ᱛᱚᱨᱚᱡ ᱪᱟᱵᱟᱭᱮᱱ ᱛᱟᱢ ,
ᱪᱮᱠᱟᱢ ᱤᱬᱤᱡ ᱫᱤᱥᱚᱢ ᱟᱛᱟᱨ !
***
