ᱥᱚᱦᱨᱟᱭ ᱠᱚ ᱥᱮᱨᱮᱧᱟ “ᱦᱟᱹᱛᱤ ᱞᱮᱠᱟᱱ ᱥᱚᱦᱨᱟᱭ ᱫᱟᱹᱭ ᱱᱟᱞᱟᱝ ᱱᱟᱛᱟᱝ ᱱᱟᱫᱮᱨᱮ, ᱦᱟᱹᱛᱤ ᱞᱮᱠᱟᱱ ᱥᱚᱦᱨᱟᱭ ᱫᱟᱫᱟ ᱞᱟᱝ ᱫᱟᱨᱟᱢ ᱫᱟᱜᱮ” ᱾ ᱥᱟᱹᱨᱤ ᱜᱮ ᱦᱟᱹᱛᱤ ᱞᱮᱠᱟᱱ ᱥᱚᱦᱨᱟᱭ ᱮ ᱥᱚᱦᱚᱨ ᱥᱮᱴᱮᱨ ᱟᱠᱟᱱᱟ ᱢᱟᱹᱱᱢᱤ ᱡᱟᱹᱛᱤ ᱞᱟᱹᱜᱤᱫ, ᱡᱤᱵᱽ ᱡᱤᱭᱟᱹᱞᱤ ᱠᱷᱟᱥ ᱠᱟᱭᱛᱮ ᱰᱟᱺᱜᱽᱨᱤ, ᱠᱟᱰᱟ ᱞᱟᱹᱜᱤᱫ ᱥᱩᱞᱩᱠ, ᱥᱟᱹᱱᱛᱤ, ᱨᱟᱹᱥᱠᱟᱹ ᱦᱚᱵᱚᱨ ᱠᱟᱛᱮ ᱾ ᱰᱟᱺᱜᱽᱨᱤ, ᱠᱟᱰᱟ ᱫᱚ ᱟᱵᱚ ᱵᱚᱪᱷᱚᱨ ᱡᱟᱠ ᱪᱟᱥ ᱠᱟᱹᱢᱤ ᱨᱮᱠᱚ ᱜᱚᱲᱚ ᱟᱵᱚᱱᱟ; ᱚᱱᱟᱛᱮ ᱩᱱᱠᱩ ᱥᱚᱦᱨᱟᱭ ᱨᱮᱵᱚᱱ ᱢᱟᱹᱱᱮᱫ ᱠᱚᱣᱟ ᱾ ᱫᱮᱨᱮᱧ ᱨᱮ ᱥᱩᱱᱩᱢ ᱵᱚᱱ ᱚᱡᱚᱜ ᱟᱠᱚ ᱠᱟᱱᱟ, ᱫᱷᱩᱵᱤ ᱜᱷᱟᱥ, ᱟᱫᱽᱣᱟ ᱪᱟᱣᱞᱮ ᱛᱮᱵᱚ ᱪᱩᱢᱟᱹᱣᱲᱟᱭᱮᱫ ᱠᱚᱣᱟ ᱾ ᱠᱷᱟᱹᱞᱤ ᱤᱱᱟᱹᱝ ᱥᱩᱢᱩᱝ ᱫᱚ ᱵᱟᱝ ᱟᱵᱚ ᱮᱱᱮᱡ ᱥᱮᱨᱮᱧ ᱠᱟᱛᱮ ᱵᱚ ᱨᱟᱹᱥᱠᱟᱹᱜ ᱠᱟᱱ ᱞᱮᱠᱟ ᱩᱱᱠᱩ ᱦᱚᱸ ᱮᱱᱮᱡ ᱥᱮᱨᱮᱧ ᱠᱟᱛᱮ ᱵᱚ ᱨᱟᱹᱥᱠᱟ ᱚᱪᱚᱭᱮᱫ ᱠᱚᱣᱟ ᱾ ᱚᱱᱟ ᱜᱮ ᱥᱚᱦᱨᱟᱭ ᱥᱮᱨᱮᱧ ᱨᱮ ᱢᱮᱱᱟᱜ-ᱟ, “ᱪᱮᱛᱟᱱ ᱴᱚᱞᱟ ᱨᱮᱢᱟ ᱜᱟᱹᱭ ᱠᱚ ᱛᱚᱞᱮ ᱠᱟᱱ, ᱞᱟᱛᱟᱨ ᱴᱚᱞᱟ ᱨᱮᱢᱟ ᱠᱟᱰᱟ ᱠᱚ ᱛᱚᱞᱮ ᱠᱟᱱ ᱾ ᱜᱟᱹᱭ ᱫᱚᱠᱚ ᱛᱚᱞᱮ ᱠᱟᱱ ᱛᱚᱲᱮ ᱥᱩᱛᱟᱹᱢ ᱛᱮ, ᱠᱟᱰᱟ ᱫᱚᱠᱚ ᱛᱚᱞᱮ ᱠᱟᱱ ᱵᱟᱺᱫᱤ ᱵᱟᱵᱮᱨ ᱛᱮ ᱾ ᱜᱟᱹᱭ ᱫᱚᱭ ᱮᱱᱮᱡ ᱡᱚᱝ ᱡᱟᱱ ᱫᱷᱩᱲᱤ ᱫᱚᱭ ᱰᱤᱜᱽᱞᱟᱹᱣᱮᱫ, ᱠᱟᱰᱟ ᱫᱚᱭ ᱮᱱᱮᱡ ᱡᱚᱝ ᱠᱟᱱ ᱞᱚᱥᱚᱫ ᱮ ᱯᱟᱹᱥᱤᱨᱮᱫ ᱾” ᱱᱚᱶᱟ ᱥᱚᱦᱨᱟᱭ ᱯᱟᱨᱟᱵᱽ ᱨᱮ ᱠᱟᱰᱟ, ᱰᱟᱹᱨᱤ ᱫᱮᱵᱟ ᱥᱮᱵᱟ ᱠᱚ ᱵᱟᱵᱚᱫᱽ ᱢᱤᱫ ᱥᱮᱫᱟᱭ ᱠᱟᱛᱷᱟ ᱦᱚᱸ ᱩᱭᱦᱟᱹᱨ ᱦᱮᱡ ᱜᱚᱫᱚᱜ ᱠᱟᱱᱟ ᱾ ᱚᱱᱟ ᱫᱚ ᱱᱚᱝᱠᱟ- ᱥᱮᱫᱟᱭ ᱡᱩᱜᱽ ᱨᱮ ᱦᱟᱯᱲᱟᱢ ᱠᱚ ᱠᱟᱰᱟ, ᱰᱟᱹᱨᱤ ᱟᱹᱰᱤ ᱠᱚ ᱦᱟᱨᱠᱮᱛ ᱠᱮᱫ ᱠᱚᱣᱟ, ᱫᱟᱞ ᱠᱮᱫ ᱠᱚᱣᱟ ᱠᱚ, ᱛᱚᱞ ᱠᱮᱫ ᱠᱚᱣᱟ ᱠᱚ, ᱵᱟᱠᱚ ᱥᱮᱵᱟ ᱡᱚᱛᱚᱱ ᱞᱮᱫ ᱠᱚᱣᱟ, ᱡᱚᱢᱟᱜ ᱧᱩᱣᱟᱜ ᱵᱷᱟᱹᱜᱤ ᱥᱟᱹᱦᱤᱡ ᱵᱟᱠᱚ ᱮᱢᱟᱫ ᱠᱚᱣᱟ ᱾ ᱟᱫᱚ ᱩᱱᱠᱩ ᱢᱟᱱ ᱵᱤᱨ, ᱠᱷᱟᱱᱰᱮᱨᱟᱭ ᱵᱤᱨ ᱛᱮᱠᱚ ᱧᱤᱨ ᱮᱱᱟ ᱾ ᱢᱟᱨᱟᱝ ᱵᱩᱨᱩ ᱟᱠᱚᱣᱟᱜ ᱫᱩᱠ ᱠᱚ ᱞᱟᱹᱭᱟᱫ ᱫᱮᱭᱟ, ᱟᱫᱚ ᱢᱟᱨᱟᱝ ᱵᱩᱨᱩ ᱩᱱᱠᱩ ᱫᱚᱭ ᱩᱠᱩ ᱠᱟᱫ ᱠᱚᱣᱟ ᱾ ᱢᱟᱹᱱᱢᱤ ᱠᱚ ᱰᱟᱹᱨᱤ ᱠᱟᱰᱟ ᱵᱟᱝ ᱧᱟᱢ ᱠᱟᱛᱮ ᱟᱹᱰᱤ ᱠᱚ ᱟᱱᱫᱟᱜ ᱮᱱᱟ, ᱜᱚᱴᱟ ᱠᱚ ᱯᱟᱱᱛᱮ ᱠᱮᱫ ᱠᱚᱣᱟ ᱚᱠᱟ ᱨᱮᱦᱚᱸ ᱵᱟᱠᱚ ᱧᱟᱢ ᱞᱮᱫ ᱠᱚᱣᱟ ᱾ ᱟᱫᱚ ᱢᱟᱨᱟᱝ ᱵᱩᱨᱩ ᱠᱚ ᱦᱚᱦᱚ ᱟᱫᱮᱭᱟ ᱾ ᱢᱟᱨᱟᱝ ᱵᱩᱨᱩ ᱢᱟᱹᱱᱢᱤ ᱠᱚᱭ ᱢᱮᱛᱟᱫ ᱠᱚᱣᱟ, ᱤᱧ ᱠᱟᱛᱷᱟ ᱤᱢᱟᱹᱧ ᱯᱮ ᱟᱯᱮ ᱡᱟᱱᱣᱟᱨ ᱪᱮᱟᱛᱟᱱ ᱵᱟᱯᱮ ᱱᱟᱦᱟᱪᱟᱨᱟ, ᱩᱱᱠᱩ ᱵᱷᱟᱹᱜᱤ ᱡᱚᱢᱟᱜ ᱧᱩᱣᱟᱜ ᱯᱮ ᱮᱢᱟ ᱠᱚᱣᱟ, ᱫᱮᱵᱟ ᱥᱮᱵᱟ ᱠᱚᱣᱟ ᱯᱮ ᱾ ᱢᱟᱹᱱᱢᱤ ᱠᱚ ᱢᱮᱱ ᱠᱮᱜ-ᱟ, “ᱦᱚᱭ ᱜᱚᱥᱟᱸᱭ ᱚᱱᱠᱟ ᱜᱮᱞᱮ ᱠᱟᱹᱢᱤᱭᱟ, ᱫᱟᱭᱟ ᱠᱛᱮ ᱟᱞᱮ ᱨᱤᱱ ᱠᱟᱰᱟ, ᱰᱟᱹᱨᱤ ᱨᱩᱣᱟᱹᱲ ᱠᱟᱠᱚ ᱵᱤᱱ ᱾” ᱟᱫᱚ ᱢᱟᱨᱟᱝ ᱵᱩᱨᱩ ᱢᱟᱹᱱᱢᱤ ᱨᱮᱱ ᱠᱟᱰᱟ, ᱰᱟᱹᱨᱤ ᱨᱩᱣᱟᱹᱲ ᱠᱟᱫ ᱠᱚᱣᱟ ᱾ ᱥᱚᱦᱨᱟᱭ ᱦᱤᱞᱚᱜ ᱫᱚ ᱢᱟᱹᱱᱢᱤ ᱰᱟᱹᱨᱤ ᱠᱟᱰᱟ ᱠᱟᱹᱢᱤ ᱵᱟᱠᱚ ᱤᱫᱤ ᱞᱮᱫ ᱠᱚᱣᱟ, ᱤᱱᱟᱹ ᱦᱤᱞᱚᱜ ᱫᱚ ᱩᱱᱠᱩ ᱠᱚ ᱫᱮᱵᱟ ᱥᱮᱵᱟ ᱠᱮᱫ ᱠᱚᱣᱟ, ᱮᱱᱮᱡ ᱟᱛᱮ ᱠᱚ ᱨᱟᱹᱥᱠᱟ ᱚᱪᱚ ᱠᱮᱫ ᱠᱚᱣᱟ ᱾ ᱢᱟᱹᱱᱢᱤ ᱥᱩᱢᱩᱝ ᱫᱚ ᱟᱵᱚ ᱵᱟᱵᱚ ᱢᱟᱹᱱ ᱠᱚᱣᱟ ᱵᱚᱨᱚᱢ ᱡᱚᱛᱚ ᱡᱤᱵᱽ ᱡᱤᱭᱟᱹᱞᱤ ᱪᱮᱛᱟᱱ ᱨᱮ ᱟᱵᱚᱣᱟᱜ ᱢᱟᱹᱱ ᱜᱚᱨᱚᱡᱽ ᱢᱮᱱᱟᱜ-ᱟ ᱾ ᱱᱚᱶᱟ ᱜᱮ ᱟᱵᱚᱣᱟᱜ ᱥᱚᱦᱨᱟᱭ ᱯᱟᱨᱟᱵᱽ ᱫᱚᱭ ᱞᱟᱹᱞᱟᱹᱭᱟ ᱾