ᱤᱧ ᱫᱚ ᱠᱚᱲᱟ ᱦᱚᱯᱚᱱ
ᱤᱧ ᱫᱚ ᱵᱚᱛᱚᱨᱤᱧ ᱢᱮ ᱾
ᱞᱩᱜᱽᱲᱤ-ᱞᱟᱯᱳ-ᱡᱚᱢᱟᱜ-ᱧᱩᱣᱟᱜ
ᱜᱟᱹᱫᱩᱨᱚᱜ ᱞᱟᱦᱟ ᱠᱩᱞᱤ ᱤᱧ ᱢᱮ᱾
ᱤᱧ ᱫᱚ ᱠᱚᱲᱟ ᱦᱚᱯᱚᱱ
ᱤᱧ ᱫᱚ ᱵᱚᱛᱚᱨᱤᱧ ᱢᱮ!

ᱤᱧᱟᱹᱜ ᱚᱲᱟᱜ, ᱤᱧᱟᱹᱜ ᱫᱩᱣᱟᱹᱨ
ᱚᱸᱰᱚᱠ-ᱵᱚᱞᱚᱱ ᱫᱤᱥᱟᱹᱭ ᱢᱮ
ᱵᱚᱦᱚᱜ ᱛᱩᱛᱩᱞ ᱨᱚᱯᱚᱲ ᱨᱮᱫᱚ
ᱤᱧ ᱫᱚ ᱵᱚᱛᱚᱨᱤᱧ ᱢᱮ ᱾

ᱮᱱᱮᱡ – ᱥᱮᱨᱮᱧ, ᱰᱟᱸᱰᱟ ᱦᱤᱞᱟᱹᱣ
ᱤᱧᱟᱹᱜ ᱨᱮ ᱫᱚ ᱢᱟᱱᱟ ᱵᱟᱹᱱᱩᱜ
ᱮᱨᱟ-ᱟᱭᱳ-ᱢᱤᱥᱨᱟ ᱵᱮᱛᱟᱨ
“ᱵᱤᱱ ᱪᱩᱨᱤᱛ” ᱞᱮ ᱧᱩᱢᱟᱜ ᱾

ᱨᱟᱹᱜᱤ – ᱟᱹᱲᱤᱥ ᱮᱠᱷᱮᱱ ᱤᱧᱟᱹᱜ
ᱟᱢᱟᱜ ᱠᱚᱫᱚ ᱵᱟ.ᱱᱩᱜ ᱾
ᱨᱟᱹᱥᱠᱟᱹ – ᱞᱟᱞᱚᱪ-ᱨᱚᱰᱚᱡ-ᱥᱤᱴᱷᱟᱹ
ᱤᱧᱟᱹᱜ ᱨᱮ ᱫᱚ ᱜᱟᱱᱚᱜ᱾

ᱯᱩᱸᱜᱤ – ᱯᱟᱣᱨᱟᱹᱧ ᱥᱟᱵᱟᱥ ᱨᱮᱦᱚᱸ
“ᱢᱟᱛᱟᱞ ” ᱵᱟᱝ ᱮᱢ ᱢᱮᱱᱠᱤᱧ
ᱥᱮᱨᱮᱧ ᱟᱸᱜᱟ ᱞᱮᱨᱮ ᱟᱢ
ᱩᱱ “ᱢᱟᱹᱛᱲᱤ”ᱧ ᱧᱩᱢᱟᱢ ᱾

ᱵᱟᱹᱦᱩ ᱪᱮᱛᱟᱱ ᱵᱟᱹᱦᱩ ᱧᱟᱧᱟᱢ
ᱤᱧᱟᱜ ᱨᱮᱫᱚ ᱜᱟᱱᱚᱜ
ᱡᱟᱶᱟᱭ ᱪᱮᱛᱟᱱ ᱡᱟᱶᱟᱭ ᱨᱮᱫᱚ
ᱟᱢᱫᱚ ᱟᱹᱰᱤᱢ ᱜᱩᱱᱦᱟᱹᱜ ᱾

ᱤᱧᱟᱹᱜ ᱢᱟᱭᱟᱢ, ᱤᱧᱟᱹᱜ ᱟᱹᱭᱫᱟᱹᱨ
ᱤᱧᱟᱹᱜ ᱵᱚᱝᱥᱚ ᱵᱟᱹᱛᱤ
ᱟᱭᱳ-ᱮᱨᱟ ᱟᱹᱭᱫᱟᱹᱨ ᱮᱢ
ᱩᱱᱫᱚ ᱵᱷᱤᱱᱟᱹ ᱡᱟᱹᱛᱤ ᱾

ᱴᱷᱮᱠᱟ ᱴᱷᱮᱠᱟᱧ ᱵᱟᱹᱲᱤᱡᱽ ᱨᱮᱦᱚᱸ
ᱠᱩᱪᱤᱛ ᱢᱚᱱᱛᱤᱧ ᱵᱷᱚᱲᱚᱠ
“ᱛᱟᱹᱨᱩᱵ”,”ᱡᱚᱫᱷᱟ”,”ᱠᱚᱲᱟ” ᱠᱟᱹᱱᱟᱹᱧ
ᱢᱟᱭᱟᱝ ᱨᱮ ᱤᱧᱟᱹᱜ ᱜᱚᱨᱚᱵᱽ ᱾᱾

***