ᱫᱩᱱᱤᱭᱟᱹ ᱪᱮᱛ ᱪᱤᱠᱟᱹᱜ ᱠᱟᱱᱟ
ᱚᱦᱚᱢ ᱟᱨᱩ ᱠᱮᱭᱟ
ᱥᱤᱨᱡᱚᱱᱤᱭᱟᱹ ᱞᱮᱠᱷᱟ ᱜᱚᱴᱟ
ᱟᱢ ᱫᱚᱭ ᱟᱨᱩ ᱢᱮᱭᱟ ᱾
ᱟᱞᱚᱢ ᱢᱮᱱᱟ ᱥᱤᱨᱡᱚᱱᱤᱭᱟᱹ
ᱡᱚᱛᱚᱭ ᱯᱩᱨᱩᱱ ᱠᱟᱢᱟ
ᱥᱤᱨᱡᱚᱱᱤᱭᱟᱹ ᱢᱮᱱᱟᱭ ᱜᱮᱭᱟ
ᱠᱚᱨᱚᱢ ᱦᱩᱭᱩᱜ ᱛᱟᱢᱟ ᱾
ᱥᱩᱞᱩᱠ ᱥᱟᱶᱟᱨ ᱢᱮᱱᱟᱜ ᱜᱮᱭᱟ
ᱢᱚᱱᱮ ᱡᱤᱣᱤ ᱠᱚᱨᱮ
ᱚᱱᱰᱮ ᱜᱮᱛᱚ ᱟᱣᱨᱤᱢ ᱥᱮᱴᱮᱨ
ᱟᱨ ᱦᱚᱢ ᱢᱮᱱᱟ ᱯᱚᱨᱮ ᱾
ᱱᱚᱣᱟ ᱢᱚᱱᱮ ᱱᱚᱝᱠᱟᱱ ᱜᱮᱭᱟ
ᱵᱟᱦᱟ ᱧᱮᱞ ᱛᱮ ᱟᱫᱚᱜ
ᱡᱚᱛᱷᱟᱛᱽ ᱚᱠᱛᱚ ᱟᱥᱩᱞᱚᱜ ᱰᱟᱦᱟᱨ
ᱦᱟᱯᱮ ᱥᱮᱴᱮᱨ ᱜᱚᱫᱚᱜ ᱾
ᱮᱱ ᱦᱚᱸ ᱱᱚᱝᱠᱟ ᱥᱟᱨᱤ ᱢᱮᱱᱟᱜ
ᱢᱚᱱᱮᱢ ᱜᱚᱴᱟ ᱞᱮᱠᱷᱟᱱ
ᱥᱟᱶ ᱥᱟᱶ ᱛᱮᱢ ᱞᱟᱦᱟ ᱠᱚᱜ
ᱠᱩᱠᱢᱩ ᱥᱟᱨᱤᱜ ᱜᱮᱛᱟᱢ ᱾
ᱟᱭᱚ ᱵᱟᱵᱟ ᱫᱤᱥᱟᱹ ᱰᱟᱦᱟᱨ
ᱥᱮᱬᱟ ᱦᱚᱲᱚᱜ ᱦᱩᱭᱩᱜ
ᱚᱱᱟ ᱜᱮ ᱡᱚᱛᱷᱟᱛᱽ ᱚᱠᱛᱚ ᱠᱟᱱᱟ
ᱥᱩᱠᱮ ᱥᱟᱶᱟᱨ ᱦᱤᱡᱩᱜ ᱾
ᱟᱞᱚᱢ ᱢᱚᱱᱮ ᱚᱠᱛᱚ ᱵᱟᱱᱩᱜ
ᱱᱤᱛᱮᱢ ᱛᱟᱭᱚᱢ ᱟᱠᱟᱱ
ᱱᱤᱛ ᱠᱷᱚᱱ ᱜᱮ ᱠᱟᱢᱤ ᱢᱮ
ᱛᱟᱭᱚᱢᱚᱜ ᱮᱢ ᱵᱟᱠᱷᱟᱱ ᱾
ᱥᱟᱶᱛᱟ ᱨᱮᱭᱟᱜ ᱜᱷᱟᱨᱚᱸᱡ ᱛᱟᱞᱟ ᱨᱮ
ᱦᱟᱨᱟ ᱵᱩᱨᱩ ᱞᱮᱱᱮᱢ
ᱚᱱᱟ ᱥᱟᱶᱛᱟ ᱞᱟᱜᱤᱛ ᱱᱤᱛᱜ
ᱪᱤᱠᱟᱹ ᱵᱟᱢ ᱩᱭᱦᱟᱹᱨ ᱮᱱᱮᱢ !
ᱜᱩᱡᱩᱜ ᱥᱮᱴᱮᱨᱚᱜᱼᱟ ᱢᱤᱛᱫᱤᱱ
ᱩᱭᱦᱟᱹᱨ ᱦᱚᱸ ᱛᱟᱦᱮᱸᱱ
ᱥᱟᱶᱛᱟ ᱞᱟᱜᱤᱛ ᱠᱟᱢᱤ ᱠᱟᱜ ᱢᱮ
ᱫᱤᱱᱟᱹᱢ ᱜᱮ ᱢᱚᱦᱮᱱ ᱾
ᱥᱟᱶ ᱨᱮ ᱢᱮᱱᱟᱭ ᱥᱤᱨᱡᱚᱱᱤᱭᱟᱹ
ᱥᱟᱶ ᱨᱮ ᱟᱭᱚ ᱵᱟᱵᱟ
ᱥᱟᱶ ᱨᱮ ᱛᱟᱦᱮᱸᱱ ᱥᱟᱶᱛᱟ ᱛᱟᱵᱚ
ᱟᱨᱤ ᱪᱟᱞᱤ ᱥᱮᱵᱟ ᱾
ᱚᱱᱟ ᱛᱮᱜᱮ ᱢᱟᱹᱱᱢᱤ ᱟᱵᱚ
ᱛᱟᱦᱮᱸ ᱠᱚᱜ ᱵᱚ ᱫᱟᱲᱮ
ᱮᱛᱷᱚᱵ ᱠᱟᱱ ᱵᱟᱧᱪᱟᱣᱜ ᱨᱮᱭᱟᱜ
ᱩᱭᱦᱟᱹᱨ ᱢᱮ ᱵᱟᱲᱮ ᱾
ᱥᱩᱭᱟᱜ ᱠᱟᱢᱤ ᱥᱟᱵᱲᱤ
ᱚᱦᱚᱭ ᱠᱟᱢᱤ ᱠᱮᱭᱟ
ᱥᱟᱶᱛᱟ ᱞᱟᱜᱤᱛ ᱦᱩᱰᱤᱧ ᱢᱟᱨᱟᱝ
ᱞᱟᱥᱟᱬᱦᱮᱛ ᱜᱮᱭᱟ ᱾
ᱞᱟᱦᱟ ᱠᱚᱜ ᱢᱮ ᱥᱚᱨᱮᱥ ᱦᱚᱨᱛᱮ
ᱟᱞᱚᱢ ᱜᱚᱨᱚᱵ ᱢᱟᱨᱟᱝ
ᱦᱩᱰᱤᱧ ᱦᱩᱰᱤᱧ ᱨᱚᱦᱚᱲ ᱡᱚᱱᱫᱨᱟ ᱦᱚᱸ
ᱜᱚᱨᱚᱵ ᱛᱟᱢ ᱠᱚ ᱛᱮᱨᱟᱝ ᱾
ᱚᱠᱛᱚ ᱢᱮᱱᱟᱜ ᱜᱮᱭᱟ ᱦᱟᱯᱮ
ᱡᱤᱨᱟᱣ ᱞᱮᱱ ᱜᱤᱧ ᱠᱟᱴᱤᱡ
ᱚᱱᱠᱟ ᱟᱞᱚᱢ ᱢᱮᱱᱟ ᱮᱲᱮ
ᱵᱟᱦᱟᱱᱟ ᱜᱮᱛᱚᱢ ᱞᱟᱴᱤᱡ ᱾
ᱞᱚᱜᱚᱱ ᱛᱮ ᱴᱷᱤᱠᱟᱹᱭ ᱢᱮ
ᱫᱤᱥᱟᱹ ᱯᱩᱨᱩᱱ ᱦᱩᱭᱩᱜ
ᱟᱠᱤᱞ ᱜᱮᱭᱟᱱ ᱟᱨᱡᱟᱣ ᱢᱮ
ᱞᱟᱯᱷᱟᱝ ᱴᱷᱟᱶᱮᱢ ᱛᱤᱭᱩᱜ ᱾
ᱢᱟᱹᱱᱢᱤ ᱦᱚᱯᱚᱱ ᱠᱟᱱᱮᱢ ᱮᱱᱛᱮ
ᱵᱟᱝ ᱜᱟᱱᱚᱜ ᱜᱮ ᱵᱟᱱᱩᱜ
ᱞᱟᱥᱮᱨ ᱦᱟᱛᱟᱝ ᱵᱮᱱᱟᱜ ᱢᱮ
ᱥᱟᱨᱤ ᱛᱮᱜᱮᱢ ᱜᱩᱱᱩᱜ ᱾
*~*
